Chayanne esgota en dous minutos as reservas telemáticas para Castrelos
O artista portorriqueño actuará en Vigo o vindeiro 30 de xullo, ás 22:00 horas, nun dos concertos máis agardados da programación de Vigo en Festas. Ás 16:00 horas sairán á venda outras 2.000 presenciais e 500 online.
As primeiras reservas para asistir ao concerto de Chayanne no auditorio de Castrelos esgotáronse en apenas dous minutos na modalidade de venda telemática. Abel Caballero destacou o extraordinario ritmo da venda na primeira quenda da xornada. “A venda está indo a moi boa marcha. De feito, a venda telemática durou dous minutos. Nese tempo asignáronse as 500 reservas por vía telemática”, sinalou.
Mentres as reservas en liña quedaron esgotadas de inmediato, a venda presencial continúa durante a mañá e reanudarase pola tarde, seguindo o sistema habitual establecido polo Concello. Ás 16:00 horas sairán á venda outras 2.000 presenciais e 500 online.
Chayanne chegará a Castrelos coa súa xira "Bailemos otra vez", na que repasa os grandes éxitos dunha carreira de máis de catro décadas. O cantante portorriqueño, con máis de 50 millóns de discos vendidos e himnos como Torero, Bailando Bachata, Salomé ou Dejaría todo, foi unha das incorporacións máis demandadas pola cidadanía para o cartel deste verán.
O rexedor avanzou tamén que o calendario de venda das reservas continuará mañá "coas reservas do concerto de Abraham Mateo e o xoves sairán á venda as reservas de The Corrs”. O artista gaditano celebrará a súa actuación no coliseo vigués o vindeiro 7 de agosto, mentres que a banda irlandesa chegará a Vigo o 11 dese mesmo mes.