O goberno municipal adxudica a humanización entre as rúas Gregorio Espiño e Reiseñor
O goberno municipal aprobou este venres a adxudicación das obras de humanización entre as rúas Gregorio Espino e Reiseñor, que contará cun investimento próximo aos dous millóns de euros, segundo avanzou o alcalde.
Abel Caballero explicou hoxe que a humanización das rúas Gregorio Espino e Reiseñor conta cun prazo de execución de 10 meses, e que a intervención abranguerá un tramo de 300 metros da rúa, con melloras como a ampliación das beirarrúas e os espazos verdes, ademais de maior seguridade no tráfico.
O Concello renovará todas as redes de servizos, segundo remarcou o alcalde ao incidir en que se creará unha praza nova entre as rúas San Roque e Couto de San Honorato que contará cunha pequena bancada e un espazo verde. Na rúa Talude e na Avenida de Gregorio Espino reservarase espazo de aparcamento. “Unha humanización de última xeración e San Roque meréceo”, afirmou o alcalde.
Campo de fútbol de Bouzas
Entre os acordos da Xunta de Goberno aprobados hoxe tamén se atopa a adxudicación das obras para a renovación integral da cuberta da bancada do campo de fútbol de Bouzas, cun investimento de máis de 300.000 euros. A obra executarase en 3 meses e supoñerá a retirada de todos os elementos degradados pola acción da proximidade ao mar e a instalación dunha nova iluminación.
As novas pezas a instalar “van ser de características distintas”, avanzou o alcalde, que lembrou que recentemente o Concello destinou 50.000 euros a reformar os vestiarios e que a principios desta década investiu preto de 400.000 euros en renovar o céspede. “Seguimos atendendo a todo o que ten que ver co campo de fútbol de Bouzas”, afirmou o alcalde.