Comeza o desenvolvemento do ámbito das rúas Jacinto Benavente e Torrecedeira co 30% de vivenda de protección
Abel Caballero avanzou este venres a “gran transformación” que supón o inicio do desenvolvemento urbanístico do ámbito de Beiramar, entre as rúas Jacinto Benavente e Torrecedeira, onde se construirán entre 400 e 450 vivendas, das que 130 contarán con protección. O expediente será aprobado na Xerencia de Urbanismo.
O ámbito conta cunha superficie de máis de 29.000 metros cadrados, dos que o o 75 por cento é para vivendas e o resto será cedido ao Concello para equipamentos e zonas verdes. “Estamos a desenvolver unha zona na que eliminamos unha especie de feísmo dalgunhas zonas; unha nova construción; unha parte importantísima de vivendas de protección e zonas de equipamentos”, recalcou e alcalde ao apuntar como “extraordinario” o espazo para desenvolver fronte ao mar de Vigo.
“Unha forma de refacer, cunha enorme calidade e importancia, toda a zona de Jacinto Benavente”, recalcou ao avanzar que se eliminará o desnivel que existe con Marqués de Valterra para crear “unha gran avenida urbana, flanquedada por vivendas de enorme brillantez arquitectónica”
Ámbito residencial Santa Cristina
A Xerencia de Urbanismo iniciou un novo procedemento de contratación do servizo de redacción do proxecto de urbanización de Santa Cristina – Lavadores, onde estaba o parque central municipal. O anterior procedemento foi declarado deserto porque a única oferta presentada non recibiu a conformidade da mesa de contratación. Polo tanto, procédese a unha nova licitación cun importe de adxudicación de 48.624 euros.
Tal e como explicou o alcalde, o Goberno de Vigo quere desenvolver un ámbito de 200 vivendas en réxime de protección “pensando fundamentalmente na xente nova” que precisa alugueiros ou compras “a prezos taxados”.