mércores, 10 novembro 2010

Urbanismo elaborará en quince días o proxecto de demolición dos apartoteis de Samil para dar cumprimento á senteza xudicial de derrubo

mércores, 10 nov 2010

O concelleiro de Urbanismo, José Mariño, informou este mércores da planificación municipal para "dar cumprimento á sentenza xudicial" de derrubo do inmoble. En 15 días estará elaborado o proxecto, será enviado aos xulgados, notificarase as decisións aos propietarios e os suministros eléctricos e de abastecemento quedarán cortados o 29 de xaneiro. Despois adxudicarase o proxecto de demolición do edificio.

Santi Domínguez di que a participación de Ademar, Barcelona, Ciudad Real e Valladolid garante o éxito da Copa Asobal

mércores, 10 nov 2010

O tenente de alcalde, Santi Domínguez, destacou este mércores que o éxito da XXI Copa Asobal de Balonmán, que se celebrará os días 18 e 19 de decembro no pavillón das Travesas, "está asegurado porque os catro mellores equipos do mundo non deixan indeferente a ninguén". Destacouno tras o acto no que se sortearon os emparellamentos das semifinais, que enfrontarán ao Reale Ademar León co F.C. Barcelona Borges e ao Renovalia Ciudad Real co Cuatro Rayas Valladolid.

A Xunta de Goberno Local da luz verde á pasarela ecolóxica no borde litoral de Teis

mércores, 10 nov 2010

Abel Caballero informou hoxe mércores que os traballos arrancarán en dúas semanas e que nelas se investirán 875.646 euros. Ademais a Xunta aprobou tamén a adxudicación das obras da Avenida de Galicia que asumirá o goberno local a pesar de ser unha estrada de competencia autonómica. A contratación de persoal por ampliación do programa municipal de emprego UTIL e a modificación do proxecto da humanización de Manuel Álvarez son outros dos puntos aprobados este mércores.

O alcalde renova o convenio coa Asociación Monte da Mina de Castrelos para manter o viveiro de empresas

mércores, 10 nov 2010

O Concello de Vigo e a AVCD Monte da Mina de Castrelos rubricaron este mércores o convenio de colaboración entre as entidades para a cesión de espazos da Asociación para viveiros de empresas, que selecciona o Concello, un acordo polo que o goberno local concede unha subvención directa de 9.000 euros e constitúen ambas partes unha comisión de seguemento do texto.

A Federación de Asociacións de Familiares e Persoas con Enfermidade Mental colabora con Medio Ambiente na recuperación dos humidais

mércores, 10 nov 2010

A Concellería de Medio Ambiente que dirixe a socialista Chus Lago conveniou coa Federación de Asociacións de Familiares e Persoas con Enfermidade Mental de Galicia (FEAFES Galicia) a execución dun proxecto de inserción laboral para este colectivo, que realiza tarefas de limpeza no humidal de Muiños-Goberna. O pasado 2 de novembro plantaron asemade árbores autóctonas neste espazo.

Normalización Lingüística presenta en Cataluña a experiencia do programa de dinamización do galego na mocidade DuploR

mércores, 10 nov 2010

O Servizo de Normalización Lingüística do Concello de Vigo presentará mañá nas xornadas "Competencias, representacións e usos da lingua no ámbito xuvenil", organizadas pola Universidade Rovira i Virgili de Tarragona, a experiencia de dinamización da lingua galega a través do programa Duplo R, destinado a mozos e mozas. Segundo destacou a concelleira de Normalización Lingüística, Iolanda Veloso, "Vigo está poñendo en marcha iniciativas novidosas, que tentan amosar que tamén se pode vivir en galego, e que noutros territorios queren poñer como exemplo".