Hoxe mércores deu comezo en Vigo o X Congreso e Exposición Internacional de Praias "Ecopraias 2008", tres días de relatorios e actividades que reúne na cidade a 113 representantes de 49 concellos e distintas empresas vinculadas coa xestión dos areais. O alcalde, Abel Caballero, inaugurou o Congreso, no que participará a edil de Medioambiente, Chus Lago.
O tenente de alcalde, Santi Domínguez, salientou este mércores que Vigofeira, que se celebrará do 25 de outubro ao 2 de novembro no Instituto Feiral de Vigo, "xa se ten consolidado como referente da Eurorrexión Galicia – Norte de Portugal así como dos países hispanoamericanos". O tenente de alcalde así o subliñou na presentación deste evento, no que estivo acompañado polo xerente do IFEVI, Arsenio Prieto, e o representante da empresa organizadora da feira, Planner Proceltha, Pedro Corbacho.
Abel Caballero e Pablo González, membro do Comité organizador do Festival Aéreo internacional de Vigo, acordaron hoxe mércores iniciar os contactos institucionais para mellorar e ampliar a edición de 2009. Así, o alcalde se entrevistará co embaixador de EE.UU. e con responsables do ámbito aéreo europeo e do Exército do Aire español. O obxectivo é convertir ao de Vigo no "festival aéreo máis importante de Europa".
O festival Are More 2008, que cumpre a súa novena edición, abrirá o vindeiro 30 de outubro coa actuación de Diego el Cigala no Teatro Salesianos. O ciclo adicado ás mulleres e a homenaxe ao compositor Eduardo Soutullo conforman alunhas das novidades do Are More "máis rompedor", segundo o cualificou o tenente de alcalde, Santi Domínguez, na súa presentación, quen estivo acompañado polo concelleiro de Cultura, Xesus López, a vicerreitora de Extensión Universitaria, Carmen Cabezas, a representante da Fundación Caixa Galicia, Gloria Lago, e o director artístico do festival, Roberto Relova.
A concelleira de Igualdade, a nacionalista Iolanda Veloso, inaugurou este mércores o curso formativo de promotoras de igualdade de oportunidades entre homes e mulleres. No acto, agradeceu o interese das persoas participantes na iniciativa, en especial aos homes que amosaron o seu interese. O curso desenvolverase ata o 13 de novembro e está dirixido a persoas con formación nas ciencias sociais e/ou cunha especial sensibilización co enfoque de xénero.