Escoitar

A Policía Local formará a menores infractores en seguridade vial

O alcalde, Abel Caballero, e o Fiscal Superior de Galicia, Carlos Varela, asinaron este martes o convenio polo que a Policía Local educará a menores de entre 14 e 18 anos infractores contra a seguridade vial cun dobre obxectivo: o arrepentemento e a sensibilización. O 95% dos menores que participan nesta formación -pioneira en Galicia- non volven delinquir.

martes, 14 xul 2009
1247575642fiscal.jpg
O alcalde de Vigo, Abel Caballero, e o Fiscal Superior de Galicia, Carlos Varela, rubricaron este martes un convenio pioneiro en Galicia polo que a Policía Local de Vigo formará en educación vial a menores de entre 14 e 18 anos que cometeran algunha infración contra a seguridade viaria.

O convenio, dun ano de duración prorrogable, establece que dous axentes e un oficial impartan cursos de formación de 10 horas de duración aos menores infractores para que, tras o informe favorable da Policía Local, a Fiscalía poida arquivar o expediente sancionador. Segundo citou o Fiscal Superior de Galicia, "o 95% dos menores que participan non volven delinquir".

O programa procura dous obxectivos a conseguir para os menores: o seu arrepentimento e asunción da falta que cometeran e a sensibilización vial para que no futuro sexan condutores responsables.

O alcalde salientou a "vontade de reeducación" desta iniciativa e "disposición" da Policía Local viguesa para o desenvolvemento deste convenio, que porase en marcha "de inmediato", segundo indicou Abel Caballero.
Descargar todas as imaxes