O goberno local habilita 100 novas prazas dentro do programa Vigo en inglés
O Concello vén de sumar 100 novas prazas ás 927 adxudicadas ata o de agora dentro do programa Vigo en inglés. Tal e como explicou o rexedor, os novos beneficiarios serán contactados proximamente entre os alumnos que están en lista de agarda.
Este ano gozarán dunha estadía de inmersión lingüística 1.027 alumnos de 4 da ESO dentro do programa Vigo en Inglés. O alcalde vén de anunciar que se habilitarán 100 prazas máis que se sumarán ás 927 bolsas concedidas ata o de agora para que viaxe o maior número de estudantes posible. Os novos beneficiarios serán contactados proximamente, indicou, para trasladarlles as condicións da estadía en Reino Unido ou Irlanda.
O importe desta acción educativa é de 3,2 millóns e o prezo por alumno é de 3.235 euros. Este ano contarán con 55 monitores, ata o de agora eran 47, polo que haberá 16 alumnos por monitor.
Caballero participou onte na sesión informativa para as familias ás que xa se lles comunicou que teñen praza para viaxar a partir do mes de setembro.