O Goberno local incrementa o orzamento de Educación ata os 18,3 millóns de euros en 2026

Entre as partidas máis destacadas, Caballero subliñou as becas de comedor, con 2,5 millóns de euros, “un servizo que debería financiar a Xunta de Galicia, pero que asumimos dende o Concello para garantir que ningún neno ou nena quede sen el”.

Tamén destacou as bolsas de inglés, cun orzamento de 3.325.000 euros, o que supón un incremento de 25.000 euros, así como as bolsas para estudos de idiomas no estranxeiro a través da Escola Oficial de Idiomas, cunha partida de 175.000 euros.

O orzamento contempla ademais 3.594.000 euros para limpeza dos colexios, vixilancia e pequenos mantementos, reparacións, gasto eléctrico e calefacción.

En canto ás escolas municipais, Caballero detallou que todas contan con importantes niveis de subvención:

• EMAO (Escola Municipal de Artes e Oficios): 1.373.000 euros, cun aumento de 87.000 euros. Subvencionada ao 100%.
• Escola Municipal de Música: 485.733 euros (+39.000), cunha subvención do 70%.
• Escola Municipal de Teatro: 102.626 euros, cunha axuda do 75% para o alumnado.
• Escola Municipal de Música Tradicional e Folk (ETRAD): 282.750 euros (+26.610), subvencionada case ao 100%.
• Escola Municipal de Danza: 164.000 euros (+14.000), cunha subvención do 96%.

Respecto ás escolas infantís municipais, o Concello destina 2.378.000 euros, cun aumento de 38.730 euros. “As nosas nove escolas infantís son completamente gratuítas: as familias non pagan nada, nin sequera o servizo de comedor”, destacou Caballero. Ademais, o Concello cofinancia dúas escolas infantís da Xunta —Palencia e Hernán Cortés— con 205.000 euros.

Outros programas educativos tamén reciben financiamento municipal:

• Vigo Educa, destinado ao alumnado dos colexios da cidade, con 90.000 euros.
• UNED de Vigo, con 225.000 euros.
• Bibliotecas municipais: Mar de Vigo (110.000 €), Neira Vilas (345.000 €), Navia (47.528 €) e a Casa do Patín en Bouzas. Amais o alcalde informou de que se ampliará a rede coa nova biblioteca de Teis.
• Programa de educación básica para persoas adultas, con 39.000 euros.

O alcalde anunciou novas obras educativas para 2026, entre as que se inclúen:

• Muro do CEIP Igrexa Valadares e CEIP Valle Inclán.
• Cubrición do patio do CEIP Celso Emilio Ferreiro (755.000 euros).
• Cubrición do patio do CEIP Lope de Vega (1.095.000 euros).
• Renovación de cubertas nos edificios anexos do CEIP Chans Bembrive (500.000 euros).
• Mellora do peche da parcela do CEIP Mestre Goldar (175.000 euros)