O segundo programa de edificación forzosa do Casco Vello permitirá actuar en 24 soares
A nova edición desta iniciativa municipal incorpora 24 inmobles do Casco Vello que acabarán saíndo a poxa pública para ser edificados de xeito forzoso. O obxectivo é consolidar a estrutura urbana existente na zona centro e promover que os propietarios exerzan a súa obriga de edificación de soares baleiros.
O Consello da Xerencia de Urbanismo aprobará inicialmente o martes que vén o segundo programa de edificación forzosa do Casco Vello, que permitirá a incorporación de 24 edificacións. O obxectivo do programa é promover que os propietarios exerzan a súa obriga de edificación ao tempo que se compacta a cidade. Consolídase a estrutura urbana existente na zona centro mediante a edificación de soares baleiros.
Unha vez aprobado o programa, abrirase un prazo de información pública e, resoltas as eventuais alegacións, aprobarase o programa de forma definitiva. Caballero explicou que o Concello disporá dun ano para sacar estes soares á puxa pública, no caso de que nese tempo os propietarios non asuman a súa responsabilidade.
Na súa intervención, o alcalde lembrou que no primeiro de edificación inscribíronse 38 inmobles dos que se rehabilitaron o 60% ou están en trámite de facelo. Este novo rexistro para 2025 incorpora 9 inmobles que xa formaron parte do primeiro programa e non foron edificados e 15 novos edificios. “Non imos deixar que propietarios que non cumpren coas súas obrigas dean mala imaxe a todo o Casco Vello que se está rehabilitando de forma excepcional”. asegurou o rexedor.