O Concello renova a colaboración con Vegalsa-Eroski para unha nova edición do "Camiño a Camiño"

O Autoservizo Familia situado no Mercado do Progreso acolleu esta mañá a rúbrica de renovación do convenio de colaboración entre o Concello de Vigo e Vegalsa-Eroski para unha nova edición do "Camiño a Camiño". Asinaron o acordo a concelleira de Medio Ambiente, Nuria Rodríguez, e o director xeral de Vegalsa-Eroski, José Manuel Ferreño, nun acto que contou coa presenza doutros participantes.

Nuria Rodríguez explicou que co lanzamento desta edición do Camiño a Camiño "estamos encantados" por "poder realizar de novo esta colaboración público-privada entre o Concello e Vegalsa, e esperamos seguir camiñando xuntos moitos anos”. Tamén destacou que "se trata dun proxecto afianzado e consagrado, que acumula 13 anos e máis de 15.000 usuarios”. Así, animou a “toda a cidadanía a anotarse a partir do luns a esta nova edición”.

Pola súa banda, José Manuel Ferreño destacou que “o Concello de Vigo sempre atopará na nosa rede comercial un aliado para a difusión deste tipo de actividades, coas que compartimos valores a nivel social, económico e ambiental”. Ambas as entidades colaboran desde o ano 2012 no marco do programa municipal que busca impulsar o lecer saudable entre os vigueses e viguesas.

Nesta edición, o programa inclúe roteiros por cinco enclaves emblemáticos de Galicia, ademais de manter o sendeirismo local, as hortas urbanas e o voluntariado ambiental en Vigo. Así, o programa municipal do Concello de Vigo regresa para redescubrir cinco espazos naturais singulares con distintos niveis de protección ambiental como son a Fervenza do Río Barosa (Barro), Monte Castrove (Meis), A Fracha (Pontevedra), Monte Galleiro (O Porriño) e Río Barxa (Sárdoma, Vigo). Camiño a Camiño contará tamén nesta edición con paseos saudables pola Senda Azul del Río Lagares (en Vigo), hortas urbanas nos barrios vigueses de Cabral, Lavadores, Ramón Nieto, Pedro Alvarado (Teis), Navia e Camelias, así como as tradicionais accións de voluntariado ambiental.

As actividades celebraranse entre o 27 de setembro e o 26 de outubro e para a súa inscrición, os interesados atoparán toda a información relativa ás mesmas en caminoacaminovigo.org ou no teléfono 010. Ademais, Vegalsa-Eroski colaborará na difusión de todas as iniciativas de “Camiño a Camiño” a través da súa rede de supermercados en Vigo, colocando material promocional e de apoio do citado programa en 17 supermercados das súas insignias de Eroski e Autoservizos Familia da cidade.