Conexións Vigo 2025 leva a música á rúa con máis de 30 concertos
O alcalde presentou este luns a segunda edición do programa, organizado xunto á Fundación Mayeusis, que está conformado por máis de 30 actuacións en diferentes formatos que se celebrarán en case unha vintena de espazos da cidade.
“Un grande programa musical que vai inundar toda a cidade”, ata o mes de xuño, avanzou Abel Caballero, ao dar conta do programa Conexións Vigo 2025 que inclúe máis de trinta concertos de cámara, grupos, big band e corpo de baile que se celebrarán en diferentes espazos da cidade.
É segunda edición dun programa musical que converte a cidade nun escenario permanente, levando a música a diferentes espazos ao aire libre con concertos de diferentes programas musicais: clásico, folk tradicional, jazz, dixie e orquestra/grupos/Imaxine Jazz Orquestra.
Na presentación deste luns, o alcalde destacou que se trata dun “desenvolvemento cultural da maior importancia” que ocupará a cidade con música na rúa, o que permite “unha relación directa con quen escoita, que era a fórmula tradicional de facer música”.
Felipe Estévez Vila, presidente da Fundación MayeusisFelipe salientou que a novidade deste ano é a danza, xa que tódolos concertos contarán cun número de baile. A intención é “acariñar, humanizar a xente de Vigo, esa é a filosofía: abrazar a cidade”. Amais, o programa dá un salto internacional incorporando no peche un grupo de Costa de Marfil, “Vocal Eburnie”, no marco do III Econtro conexións, que se celebrará no García Barbón, e que ofrecerá tamén accións musicais na rúa entre o 24 e o 27 de xuño.
A rolda de prensa contou coa actuación musical de Luis Caballero Varona, chelista e colaborador do Programa CONEXIÓNS 2025 e o bailarín Juan Morente e estivo presente tamén Lucas Alonso Pérez, director do Conservatorio Mayeusis.
Os concertos celebraranse en case unha vintena de espazos diferentes da cidade: Paseo de Alfonso, Praza Independencia, Praza da Pedra, Praza Compostela, Mercados de Teis e O Calvario, Praia de Bouzas e Samil, Príncipe, Fortaleza do Castro, Villa Solita, Pazo Castrelos, Capela A Guía, Fundación Mayeusis, rúa Miragaia-Rosalía de Castro, Colexiata de Santa María, Baluarte do Diamante e Afundación.