O alcalde avoga polas infraestruturas para vertebrar o Arco Atlántico
Abel Caballero participou este venres na inauguración da IV Conferencia de Cámaras de Comercio do Arco Atlántico, que reúne en Vigo a representantes empresariais e institucionais das rexións atlánticas europeas.
O rexedor deu a benvida á cidade a tódalas persoas que participan nun encontro que, dixo, “acollemos con entusiasmo” porque servirá para falar de “economía, de comercio e a economía move o mundo”. No seu discurso, Caballero abordou a importancia das infraestruturas que son “imprescindibles para que a produtividade exerza o seu espazo” para que as empresas poidan desenvolver a súa actividade, para o que é precisa a coordinación política e institucional. “Queremos desde Vigo ter comunicacións directas con España e con todo o Arco Atlántico porque somos espazos comúns que se teñen que vertebrar con infraestruturas”, recalcou.