Najwa Nimri presenta mañá xoves no Auditorio Municipal o seu último disco "El último primate"

O Auditorio Municipal acolle mañá, 3 de marzo ás 20.30 horas, o concerto de Najwa Nimri, no que presentará o seu último traballo discográfico "El último primate". O prezo das entradas para esta actuación, integrada na programación estable de artes escénicas da Concellería de Cultura, é de 10 euros e pódense mercar na web www.laboleteria.es ou na propia taquilla unha hora antes do comezo das actuacións.

mércores, 2 mar 2011
Este novo traballo supón para Najwa Nimri un desafío tanto persoal como musical, afastándose de sons electrónicos e por primeira vez con letras en español, algo que non fixera anteriormente. Gravado en Londres e producido pola propia Najwa Nimri xunto a Alfonso Pérez, en colaboración con Raúl Santos, "El último primate" é un disco cun fantástico son, tranquilo, punzante e con letras auténticas.

De pai xordano e nai navarra, o nome Najwa Nimri significa "éxtase" en árabe, a lingua do seu pai. De pequena trasladouse a Bilbao e vive actualmente en Madrid. Deuse a coñecer como actriz grazas ao seu papel en "Salto al vacío", a primeira película do cineasta vasco Daniel Calparsoro. En canto á súa carreira musical, antes da súa primeira incursión na pantalla, Najwa Nimri cantaba como parte do coro de Respect (música soul) e de Clan Club (jazz) e máis tarde formou xunto a Carlos Jean o grupo Najwajean. Con esta formación editou "No Blood" en 1998, "Selection" (2002), "Ten years after" (2007) e "Till it breaks" (2008), ademais das bandas sonoras de "Asfalto" e "Guerreros". En solitario publicou "Carefully", "Mayday" e "Walkabout" coas súas respectivas edicións especiais.