Escoitar

O "Vigo a escena" leva o sábado o teatro a Coia e o domingo a Castrelos e Matamá

A programación do "Vigo a escena" que organiza a Concellería de Cultura para o primeiro semestre do 2009 levará o teatro esta fin de semana ás parroquias de Coia, Castrelos e Matamá. A actuación prevista para mañá venres no Centro Cívico de Teis trasládase ao día 3 de xuño neste mesmo espazo, mentres que o sábado, 30 de maio, as actuacións serán protagonizadas polas compañías Títeres en Acción en Coia e Aforo Teatro en Castrelos, e o domingo 31 de maio actuará Aforo Teatro en Matamá.

xoves, 28 mai 2009
Coa modificación da obra prevista para mañá venres, a primeira actuación da fin de semana será o sábado ás 19 horas, no CCA "O Rueiro" de Coia, onde a de Títeres en Ación interpretará "Trastos vellos". Dirixida a un público familiar, a historia narra as aventuras de Choliño, Maripili, Marti e Ficus, quenes unen as súas forzas para evitar que os humanos limpen o vello fallado no que conviven. Cun guión intemporal e cancións propias, a obra interpretada por Marcos Escariz e Guy Bobillo está chea de gags intemporais na procura do sorriso di espectador.

A programación do sábado continúa ás 20.30 horas na AVCD Monte da Mina de Castrelos, coa representación de "Do cotián: o absurdo", da compañía Aforo Teatro. Como o seu título indica, o absurdo é o punto de partida da obra, que propón reflexionar a través do humor irónico e de accións plásticas. Dirixida por Leonel García Laborde, o elenco está composto por César Aldea, Francelina Méndez, Edgar Costas, Susana Faccio e Niki Campos Marán. O domingo 31 de maio, Aforo Teatro representará esta mesma obra nas instalacións da asociación Atlántida de Matamá.