O alcalde de Vigo recibiu este luns aos seus homólogos de Ponteareas e Salceda, Xosé Represas e Marcos Besada, respectivamente, quen manifestaron a súa conformidade co Proxecto de Lei do ente supramunicipal, cos pasos a seguir e coa gobernanza co voto ponderado, amais concordan na necesidade de que o transporte metropolitano sexa asumido pola Xunta de Galicia.
"Estou disposto" a manter un encontro con Ana Pastor "mañá mesmo". Así respondeu este luns Abel Caballero á proposta realizada pola Ministra para abordar que o tratamento urbanístico da estación do AVE de Vigo se realice por procedemento supramunicipal, unha idea coa que concorda o rexedor.
Este luns a Corporación viguesa, encabezada polo alcalde, concentrouse diante da casa consistorial para gardar un minuto de silencio en recordo do subinspector Jorge García Tudela e do axente Isidro Gabino San Martín, os dous policías nacionais falecidos no atentado sufrido pola Embaixada Española na capital de Afganistán, Kabul, o pasado venres pola tarde.
O concelleiro de Cultura, Cayetano Rodríguez, e a edil de Festas, Laura Iglesias, presentaron este luns xunto ao responsable de La Fiesta Escénica, Abel Martín, o Circo de Nadal, que por quinto ano consecutivo acolle a cidade de Vigo dentro da programación municipal. O espectáculo, de dúas horas de duración, arranca este venres en Coia co principal atractivo dos osos animatrónicos e artistas internacionais de renome.
Abel Caballero estimou positivamente que a empresa expanda a fibra óptica ao 86% da poboación de Vigo e instou a Telefónica a levala a todos os vigueses e viguesas. O alcalde, quen recibiu este luns ao director da empresa en Galicia, Manuel Alonso, indicou que a cobertura de fibra está a ser "moi importante" na cidade, tanto por esta como por outras compañías que prestan este servizo.