O Pleno aproba inicialmente as normas provisionais para o PERI do Calvario
A Corporación Municipal aprobou na sesión do mes de abril celebrada este mércores o Instrumento de Ordenación Provisional no ámbito do Polígono 32 do PERI IV-04 Calvario cos votos de PSOE e PP e a abstención do grupo mixto e do concelleiro non adscrito.
A concelleira de Urbanismo, María Xosé Caride, expuxo no Pleno que as parcelas do ámbito abranguen unha superficie de 11.000 metros cadrados, nas que se poderá construír e así "concretar os proxectos vitais de moitas familias", apuntando que a ordenación provisional permitiu a 450 familias da cidade erguer a súa vivenda e deu legalidade a a edificacións "que levaban anos arrastrando problemas".
Xabier Pérez Igrexas, edil non adscrito, malia o apoio, criticou que se trata "dun parche" trala anulación do PXOM do ano 2008 e "seis anos despois a única resposta do goberno local son parches e máis parches". Dende Marea de Vigo, Rubén Pérez, expuxo que o problema deste tipo de procedemento é que "precondiciona a redacción do Plan" e criticou o "escurantismo do urbanismo" preguntando "cando remata este goteo de recuperar pezas na cidade e cando imos ter un urbanismo que se recolla nun plan con obxectivos e con prazos". Alfonso Marnotes, voceiro do grupo popular, referiuse á ordenación provisional como "outra consecuencia de non ter PXOM" criticando a paralización da cidade pola falta de PXOM da que responsabilizou ao rexedor.
María Xosé Caride explicou que o Concello continúa traballando con "tódolos instrumentos ao seu dispor" promovendo modificacións puntuais do plan vixente para "permitir a reurbanizacion da cidade, para mellorar calidade de vida dos vigueses malia que non sempre podemos usar a Lei Vigo".