Castrelos prepárase para unha nova noite histórica apoiando a España na final do Mundial
Abel Caballero sinalou que a selección “xogará en Nova York e nós apoiarémolos desde o mellor auditorio ao aire libre do mundo, en Castrelos”. O Concello manterá a pantalla xigante para seguir a final do Mundial, que se disputará o domingo 19 de xullo ás 21:00 horas, entre España e Arxentina ou Inglaterra.
O alcalde de Vigo confirmou que o auditorio de Castrelos volverá acoller a retransmisión dun partido da selección española despois do éxito da semifinal fronte a Francia. España impúxose por 2-0 e disputará este domingo a final do Mundial ante o gañador da outra semifinal entre Arxentina e Inglaterra.
“Manteremos alí aquela pantalla xigantesca para gozar da final e da vitoria de España no Copa do Mundo”, avanzou Caballero, quen lembrou que a selección xogará por segunda vez na súa historia o partido polo título mundial. O rexedor destacou a resposta da cidadanía durante a semifinal, que reuniu, segundo explicou, a máis de 25.000 persoas en Castrelos. “Vivimos un cheo total nun clima de festa, celebración, entusiasmo e ánimo, e apoiamos a España con todas as nosas forzas”, sinalou.
A final disputarase o domingo 19 de xullo ás 21:00 horas en Nova York e poderá seguirse de maneira gratuíta desde a pantalla xigante instalada no auditorio municipal. Caballero fixo un chamamento á participación da cidadanía: “Todo Vigo a Castrelos. Imos animar, pasalo ben, divertirnos e vivir a emoción da final do Mundial 2026”. Finalizou sinalando que “eles xogarán en Nova York e nós apoiarémolos desde o mellor auditorio ao aire libre do mundo, en Castrelos”.
