venres, 6 novembro 2015

O Concello freta dous autobuses para acudir á Marcha contra as violencias machistas en Madrid

venres, 6 nov 2015

Abel Caballero informou que o goberno local puxo a disposición da cidadanía dous autocares gratuítos cos que poder acudir á capital de España para participar na "Marcha contra as violencias machistas" que se desenvolve mañá sábado. "Teñen todo o apoio do Concello de Vigo e seguiremos implacablemente a loita contra a violencia machista" . Os autobuses saen na tarde deste venres dende a Praza de España e regresan mañá pola tarde ao rematar a manifestación na que estará presente a concelleira de Igualdade, Uxía Blanco. O transporte posto polo concello súmase ao autobús que freta a Deputación de Pontevedra, polo que dende Vigo sairán tres.

Abel Caballero avoga polo estudo crítico do cambio de ciclo político actual

venres, 6 nov 2015

O rexedor asistiu na mañá deste venres ás XIX Xornadas de Outono "Debates e propostas sociais ante o cambio de ciclo político", que se desenvolveron no Auditorio do Centro Social Afundación, nas que animou aos participantes a "estudar ben o que acontece neste contexto de cambio político en España", especialmente nas propostas programáticas das novas formacións que apostan porque "manden os mercados monetarios mentres nós propoñemos que quen ten que mandar é a democracia". Caballero considerou interesantes as propostas sociais e debates deste foro no que participan persoas do ámbito académico, xurídico e institucional de diferentes países sobre dereito, traballo e formación do ámbito laboral. O encontro está organizado por Xustiza e Sociedade de Galicia en colaboración coa Universidade de Vigo

O Concello programa cinco actuacións nas parroquias co XI Certame de Teatro Afeccionado

venres, 6 nov 2015

Do 8 ao 29 de novembro, o goberno de Vigo e a Agrupación de Centros Deportivos e Culturais organizan a undécima edición dun evento que achega ás parroquias o traballo dos grupos de teatro afeccionado da cidade. Na presentación este vernes do Certame, a concelleira de Festas, Laura Iglesias, salientou o "éxito de público e participación" das distintas edicións celebradas.