Escoitar

O abastecemento e o saneamento centran a reunión do alcalde co conselleiro de Medio Ambiente

O alcalde, Abel Caballero, reuniuse este mércores no seu despacho co conselleiro de Medio Ambiente, Manuel Vázquez, para tratar, entre outros temas, o abastecemento de auga en Vigo e a súa área metropolitana e a construción da nova depuradora.

mércores, 23 xan 2008
1201104666conselleiro230108.jpg
"Temos establecida unha estratexia para que as grandes infraestruturas de abastecemento da área de Vigo queden garantidas para os próximos 30 anos", afirmou o conselleiro tras o encontro. Vázquez explicou que actualmente os técnicos do Concello de Vigo e de Augas de Galicia están a traballar xuntos na elaboración dun proxecto cuxa finalidade é asegurar o abastecemento nunha área urbana que probablemente continuará crecendo no futuro e o fará nun contexto climático no que o sur de Galicia pode volverse menos chuvioso. Segundo o conselleiro, o obxectivo é garantir para Vigo un consumo hipotético de 3.000 litros por segundo, o dobre dos 1.500 actuais, dunha maneira "medioambientalmente sostible".

Neste sentido, Manuel Vázquez indicou que a solución pode estar na construción dun novo encoro ou nun trasvase desde o río Miño. Estas son as opcións que se barallan como principais e que "analizaremos nos próximos meses" desde os puntos de vista económico e medioambiental, sinalou o conselleiro.

Depuradora

En canto á construción da nova depuradora en Coruxo, Manuel Vázquez explicou que o anteproxecto, actualmente licitado e adxudicado cun orzamento de 1 millón de euros, será recibido a finais de febreiro polo Concello de Vigo e a Consellería de Medio Ambiente, que a partir daí terán de 30 a 45 días para o analizaren. Deste xeito, a finais de marzo ou principios de abril iniciaríase o período de exposición pública do documento. A construción da nova depuradora, lembrou o conselleiro, suporá un investimento de 180 millóns de euros.

Manuel Vázquez indicou que os obxectivos desta nova infraestrutra serán, por unha parte, sanear a ría de Vigo, e por outra, asegurar a calidade medioambiental do emprazamento escollido para a súa construción.

Cinto verde

Outro dos temas tratados na reunión entre Abel Caballero e Manuel Vázquez foi o da coordinación entre as dúas institucións ás que representan para, en palabras do alcalde, "garantir a viabilidade e a utilización correcta" da rede de parques periurbanos de Vigo. Neste sentido, o conselleiro avogou por "humanizar as zonas periféricas" e anunciou a presentación dunha proposta de sendas verdes e camiños naturais, onde o espazo que rodea o río Lagares podería converterse nun "elemento medioambiental central", segundo afirmou Abel Caballero.

Por outra parte, o alcalde transmitiulle ao conselleiro a súa preocupación e "a conveniencia de que a Consellería de Medio Ambiente tome cartas no asunto" para elaborar, conxuntamente co Concello de Vigo, "un proxecto máis ambicioso" para o parque zoolóxico da Madroa. En relación a esta preocupación, Manuel Vázquez asegurou que a Consellería traballará na liña de acadar o cumprimento total da directiva europea de 2003 que obriga a Vigozoo a garantir maiores cotas de "benestar animal" e atención veterinaria nas súas instalacións.

Finalmente, preguntado pola resposta que a Consellería dará ao Plan Xeral de Ordenación Municipal enviado este mes polo Concello de Vigo para a súa aprobación definitiva, Manuel Vázquez indicou que "no que levamos lido" o Plan Xeral de Vigo cumpre "ao 100%" cos aspectos legais relacionados co medio ambiente.
Descargar todas as imaxes