Abraham Mateo chega esta noite a Castrelos cun dos grandes concertos do verán
Abel Caballero anticipou “un dos grandes concertos da historia de Castrelos” e avanzou que a actuación do artista gaditano será “un éxito absoluto”. Abraham Mateo actuará esta noite, ás 22:00 horas, no Auditorio de Castrelos nunha das citas máis destacadas da programación musical do verán.
Esta noite celébrase "un dos grandes concertos da historia de Castrelos, un dos mellores deste verán”, sinalou o alcalde, que destacou a proxección internacional de Abraham Mateo, consolidado como unha das figuras máis relevantes do pop e da música urbana xurdidas en España na última década.
O cantante chega a Vigo poucos días despois de publicar «Así», a súa nova colaboración con María Becerra e Big One, que xa suma preto de catro millóns de reproducións entre YouTube e Spotify. A principios deste verán lanzou tamén xunto a Luck Ra «El último baile». Ao longo da súa carreira, Abraham Mateo colaborou con artistas como Luis Fonsi, Becky G, Manuel Turizo, Ana Mena, Jennifer Lopez ou Sebastián Yatra, nunha traxectoria marcada pola combinación de pop, música urbana e reguetón. Os seus directos destacan ademais polo alto nivel de produción, cun importante despregamento visual e unha combinación dos seus grandes éxitos cos lanzamentos máis recentes.
“Ten unha voz potente, unha gran capacidade de transmisión e vai ofrecer un concerto certamente extraordinario”, afirmou Caballero, que convidou á cidadanía a achegarse esta noite a Castrelos para gozar da actuación.