O Concello aproba as axudas deportivas para a organización e participación en fases de ascenso

O alcalde deu conta da aprobación o pasado venres de tres novas accións de promoción do deporte que alcanzan un orzamento de case 175.000 euros. A última Xunta de Goberno aprobou as bases e a convocatoria das subvencións a entidades deportivas pola organización e participación en fases de ascenso nos tres primeiros niveis de competicións de ámbito nacional, en categoría absoluta. O montante da achega elévase aos 90.000 euros.

Tamén recibiu luz verde a subvención nominativa á Federación Galega de Atletismo para as series municipais e o Gran Premio Cidade de Vigo de atletismo, cun importe de 15.000 euros. En terceiro lugar, o alcalde referiuse á contratación de tres xogos de canastas monitorizadas para o pavillón de Quirós. Con case 70.000 euros de orzamento, este equipamento permitirá optimizar a práctica do baloncesto xa que triplicará a capacidade da pista de xogo. O obxectivo é mellorar as condicións de adestramento e competición dos e das deportistas da cidade.