A recollida de lixo orgánico medra un 13,2%
O alcalde valorou este xoves a “implicación” da cidadanía coa reciclaxe e a separación de residuos, ao dar conta do incremento dos depósitos no contedor marrón no primeiro semestre deste ano.
“Seguimos avanzando na mellora da xestión dos residuos na cidade”, apuntou Caballero ao explicar que no primeiro trimestre deste ano, entre xaneiro e marzo, medrou a recollida de materia orgánica no contedor marrón. Recolleuse un 13,2% máis que no mesmo período de 2025; un total de 327.340 toneladas de materia orgánica, fronte ás 289.180 toneladas en 2025.
“Temos que seguir implicándonos na reciclaxe e na separación de residuos para mellorar a sostibilidade”, apuntou o rexedor poñendo en valor este dato positivo.
Nestes momentos, Vigo conta con 1.462 contedores marróns para a recollida de materia orgánica, que están distribuídos por toda a cidade. O 93% son de carga lateral e o 6% son de carga traseira, que son instalados nas rúas máis estreitas.
Tal e como lembrou Caballero, o contedor marrón ábrese coa Tarxeta PassVigo e está destinado ao depósito dos restos que se producen na preparación de comidas e sobras das mesmas, que deben introducirse en bolsas biodegradables para que eses restos poidan transformarse en compost.
En canto á recollida de materia orgánica en composteiros de domicilios e centros educativos, a cidade conta nestes momentos con 3.909 instalados en casas particulares e 58 en colexios. Desde o ano 2023 xestionáronse 1.793 toneladas de orgánico, que se destinan maioritariamente a abonos naturais.