O Nadal de Vigo loce nos autobuses de Avanza de varias cidades españolas

Abel Caballero puxo en valor a campaña promocional que desenvolve o Grupo Avanza e que cualifica como “moi importante para Vigo; unha gran cooperación que agradezo moito. O Nadal de Vigo é un fenómeno sociolóxico de importancia extraordinaria e queremos seguir lanzando a idea do que significa”.

Tal e como explicou Caballero, o Nadal de Vigo chega un ano máis aos autobuses do Grupo Avanza, que se converten nun escaparate itinerante para difundir a imaxe de Vigo e a súa iluminación con imaxes promocionais en tres autobuses interurbanos de Madrid que cobren os municipios de Vilalba, Xetafe e Coslada e en dous autobuses das liñas de longo percorrido entre Madrid e Valencia e entre Madrid e Segovia.

A previsión é que a campaña chegue a 16 millóns de persoas: “un gran efecto”, apunta o rexedor, que se suma ao número “elevadísimo” de visitantes de Madrid que chegan á cidade. “Agradecemos moito a campaña, o apoio á cidade e a vosa maneira de facer un magnífico transporte urbano na cidade”, transmitiu a Valentín Alonso.

Pola súa parte, o director xeral de Avanza, Valentín Alonso, explicou que a campaña nace da súa vinculación con Vigo “que é a miña segunda cidade” e do “compromiso cos nosos clientes, que son os vigueses”. Tal e como sinalou, permite poñer en valor un patrimonio cultural de Vigo que é o Nadal e “tiñamos claro que queriamos permitir que o resto dos españois disfruten dos Vitrasas de Xetafe, de Valencia...que disfruten do Nadal de Vigo”. Na presentación tamén estivo presente Carlos González, director xeral de Vitrasa.