O Mercado do Calvario celebra o primeiro centenario do seu edificio cunha exposición ao aire libre
O alcalde visitou a mostra que dá a coñecer a evolución histórica, arquitectónica e social deste espazo emblemático de Vigo. O proxecto divulga como, a principios do século XX, o Concello impulsou a creación dun mercado municipal para mellorar as condicións de conservación e venda dos produtos frescos. A exposición analizará os dous proxectos arquitectónicos redactados polo arquitecto Jacobo Esténs: o primeiro, de 1916, e o definitivo, de 1925, que deu forma ao edificio actual. O percorrido expositivo estrutúrase en catro cubos, cada un deles con catro lonas. Inclúese tamén a realización de debuxos orixinais do Mercado do Calvario, da Igrexa dos Picos, do Caserón Michel Pacewicz e das Adegas Bandeira, realizados por un ilustrador profesional.
