O Concello amplía os horarios dos 8 cemiterios municipais por Todos os Santos
Os cemiterios municipais permanecerán abertos entre as 09,00 e as 18,30h os días 30 e 31 de outubro e o 1 e 2 de novembro para facilitar o acceso da cidadanía. Ademais, as persoas que visiten Pereiró, Lavadores e Teis poderán gozar de exposicións sobre a historia da cidade.
Con motivo da celebración de Todos os Santos amplíanse os horarios dos oito cemiterios municipais que estarán abertos ininterrompidamente desde as 9,00 ata as 18,30 h os días 30 e 31 de decembro e o 1 e 2 de novembro. Este horario estará dispoñible en Beade, Bembrive, Cabral, Candeán, Lavadores, Pereiró, Teis e Zamáns.
O Concello volverá exhibir exposicións en tres dos camposantos. No cemiterio de Pereiró instalaranse 4 cubos con imaxes que recrean unha viaxe cultural e histórica recuperando a presenza de figuras que marcaron o devir cultural de Vigo e Galici; personalidades destacadas en ámbitos tan variados como o cinema, as artes plásticas, as letras, a arquitectura ou a escultura.
As persoas que se acheguen ao cemiterio de Teis atoparanse con “Catro momentos na historia de Vigo”, 16 paneis distribuídos en 4 cubos cun panel para cada unha das personaxes relevantes na historia da cidade, un panel gráfico e outros dous dedicados a narrar o contexto e as particularidades de cada unha das épocas.
A exposición de Lavadores leva por título “Os cemiterios de Vigo e os seus barrios” e, a través de varios paneis con fotografías repasa a historia dos oito camposantos municipais e dos barrios nos que se asentan. A mostra inclúe unha pequena referencia aos cemiterios privados.
Transporte público
O Concello duplicará este ano as frecuencias das tres liñas nocturnas con motivo da noite de Samaín, co obxectivo de facilitar os desprazamentos e ofrecer unha alternativa segura e accesible a todas as persoas que participen nas celebracións do 31 de outubro.
A liña C1 pasará a ter unha frecuencia de 15 minutos, mentres que as liñas N1 e N4 operarán con frecuencias de 35 minutos. Ademais, o servizo prestarase con vehículos articulados, co fin de aumentar a capacidade e responder á elevada demanda prevista.
Durante a pasada edición, máis de 3.200 persoas empregaron o servizo nocturno especial, confirmando o éxito desta iniciativa que garante un retorno cómodo e seguro ás súas casas e contribúe a un lecer responsable na cidade.
Camposantos
Con motivo do Día de Todos os Santos que terá lugar o sábado 1 de novembro, reforzaranse todas as liñas que prestan servizo aos cemiterios ao longo da xornada, segundo a demanda dos viaxeiros.