Caamaño&Ameixeiras, primeiro concerto nos xardíns do Pazo de Castrelos o 6 de xullo
O ciclo de concertos enmárcase na celebración do centenario da doazón do pazo á cidade por parte do Marqués de Alcedo. Os xardíns de Castrelos acollerán a este grupo de música tradicional galega o domingo a partir das 12:30 horas. Caballero tamén informou de que o mércores 9 de xullo comeza o programa "Tardes no museo" na Pinacoteca.
Abel Caballero convidou á cidadanía a gozar do concerto de Caamaño&Ameixeiras este domingo 6 de xullo en Castrelos. É o primeiro do ciclo de concertos organizados nos xardíns do pazo como actos de celebración polo centenario da doazón do pazo á cidade por parte do Marqués de Alcedo. A actuación de nova música tradicional galega será ás 12:30 horas.
O ciclo continúa os outros tres domingos de xullo, á mesma hora, coa actuación o 13 de xullo de Carla Lourdes, o 20 de xullo de Antifrágil e o 27 de xullo de Helena Egea.
Programa didáctico museos
O 9 de xullo comeza “Tardes no museo”, un dos eixos que forma parte do programa didáctico de museos e que se desenvolverá na súa primeira sesión na Pinacoteca. O obxectivo destas xornadas é achegar ás familias e o público en xeral as exposicións temporais e coleccións permanentes da rede de museos municipais.
O programa completo contempla 465 sesións educativas ao longo de ano para o alumnado de educación infantil, primaria e secundaria con distintas actividades. O investimento neste programa é de 50.000 euros ao ano. “Queremos establecer unha relación participativa entre os museos e o público que os visita con propostas gratuítas”, afirmou o alcalde.
O conxunto da programación educativa ten tres accións principais: campamentos de verán, accións nos centros escolares para que a mocidade de Vigo coñeza os museos da cidade e as tardes nos museos.
Datos turismo maio INE
“Vigo é unha cidade de moda en España”, declarou Abel Caballero na súa valoración dos datos do INE de turismo do mes de maio. A cidade rexistrou os mellores datos de viaxeiros nacionais nun mes de maio desde que hai rexistros.
Caballero valorou o turismo diversificado que chega a Vigo, con nacionais e estranxeiros a partes iguais. “Estamos xerando crecemento de emprego no ámbito da industria pero tamén no ámbito do turismo”, valorou.