O goberno municipal outorgará licenza de obra para unha sala de vodas no Casco Vello
O Consello da Xerencia de Urbanismo dará luz verde o próximo martes á licenza de obra solicitada pola Xunta de Galicia para adaptar un local da rúa Abeleira Menéndez como sala de vodas.
O alcalde avanzou que o Concello aprobará a licencia de obra solicitada pola Xunta de Galicia para realizar obras no edificio da rúa Abeleira Menéndez números 24-26, que consistirán na adaptación do local para dedicalo a uso socio-cultural-recreativo como sala de vodas.
Situado nunha planta baixa, distribúese en sala de vodas, despacho, aseo e un patio cun aforo máximo autorizado no espazo da cerimonia de 21 persoas. O alcalde censurou a capacidade do local “nunha sala de 36 metros cadrados”, o que supón “unha degradación que a Xunta proporcione ese local” para celebrar as vodas civís na cidade.
Pola contra, sinalou, o Concello quere dar ás vodas “a importancia que teñen” poñendo ao dispor da cidadanía “o gran ámbito” do Pazo de Castrelos e o museo da Pinacoteca Francisco Fernández del Riego, “grandes salas, ben ambientadas, ben decoradas” para celebrar estes actos civís.