O Concello abre a convocatoria das axudas á instalación de ascensores en edificios
A Xerencia de Urbanismo aprobou este martes a convocatoria para outorgar axudas para a mellora da accesibilidade e a eliminación de barreiras arquitectónicas en edificios residenciais colectivos, que ten un importe de 100.000 euros en dous anos.
![Abel Caballero na súa comparecencia en rolda de prensa](https://xornal.vigo.org/storage/images/opt/VfXWSax2r9FnUWpnKbBAlKqbDYN1hIBekBBsi4EV.jpeg)
“En Vigo hai un número importante de edificios que precisan deste tipo de habilitación, que precisan reformas para trazar a accesibilidade nas vivendas e para salvar estas dificultades seguimos facendo os nosos programas”, expuxo Abel Caballero, ao informar este martes da apertura da convocatoria das axudas para o período 2022-2023.
Tal e como explicou, o programa de axudas está pensado para aquelas vivendas que non dispoñen de ascensor e nas que residen persoas de idade. O Concello destinará 100.000 euros no período 2022-2023.
O importe máximo total a subvencionar por edificio residencial colectivo é de 3.000 euros para actuacións realizadas entre o 1 de xaneiro de 2022 e o 15 de outubro de 2023. A estas axudas poden acollerse actuacións de primeira instalación de ascensores, ramplas, plataformas elevadoras, varandas ou obras que teñan por finalidade salvar os desniveis existentes entre a beirarrúa e o portal ou entre o portal e o ascensor. Serán as comunidades de propietarios ou grupos de propietarios os que deben presentar as solicitudes tras a publicación no BOP da convocatoria.
Deporte de elite
O alcalde deu conta dos acordos adoptados na Xunta de Goberno Local. Aprobouse a subvención nominativa, mediante convenio, a favor do Sárdoma Club de Fútbol como entidade de elite de Vigo, pola dinamización do seu proxecto deportivo na temporada 2021-2022, que ten un importe de 23.000 euros. A entidade conta cun equipo de elite que participa na categoría primeira (1ª División Nacional Feminina G1), “un grande equipo de fútbol feminino e un valor importante”, apuntou o rexedor, para a promoción do deporte feminino vigués.
Tamén recibiu luz verde a subvención nominativa mediante convenio a favor da Asociación Deportiva Carballal, como entidade de elite de Vigo, pola dinamización do seu proxecto deportivo en 2021-2022 cun importe de 28.000 euros. O Carballal conta cun equipo de elite na modalidade de balonmán feminino na categoría segunda (División de Honra Prata Feminina). O alcalde destacou as “dúas subvencións significativas a dous clubs femininos”.
Emprego
A Xunta de Goberno Local aprobou dous convenios de colaboración co fin de xerar emprego. O primeiro, coa Confederación Provincial de Empresarios de Pontevedra para a organización e execución da xornada informativa “Fomento do emprendemento e a cultura empresarial do proxecto “Vigo pola inserción laboral”, que ten un importe de 4.585 euros. O segundo, coa Asociación de Empresarias de Galicia para a organización e execución da xornada informativa “Motivación e apoio a persoas con dificultades no acceso ao emprego tamén no marco do “Vigo pola inserción laboral” e co mesmo importe: de 4.585 euros, que irán destinados a mulleres emprendedores para fomentar a súa actividade no ámbito empresarial.
Caballero explicou que co programa “Vigo pola inserción laboral” “queremos promover as habilidades sociais do alumnado máis vulnerable” a través dos itinerarios formativos de comercio e márketing, hostalería e turismo, que son sectores que ofrecen unha vía importante no Concello á hora de xerar emprego.
Unicef
A Xunta de Goberno resolveu amais a subvención directa á Fundación UNICEF- Comité Español para o desenvolvemento do proxecto “Resposta de UNICEF ás necesidades humanitarias derivadas da crise de Ucraína” por un importe de 10.000 euros, que se dedicarán á atención a mulleres e nenos que atravesan dificultades por mor da guerra.