O alcalde anima aos colexios vigueses a participar nas viaxes pola ría a bordo do Nautilus
O Concello iniciou este luns os percorridos didácticos pola ría de Vigo cos que os escolares de 6º de Primaria poderán “afondar no coñecemento” do medio mariño grazas ao programa municipal.
![Abel Caballero conversa co alumnado antes de iniciar a travesía](https://xornal.vigo.org/storage/images/opt/KzpxhCZjwwIbxvk33G2ROGL5qa0knIKEwm5bG4ft.jpeg)
Abel Caballero saudou no Nautilus ao alumando de tres centros educativos da cidade (Ceip Chans Bembrive, Ceip Eduardo Pondal e Ceip Pintor Laxeiro), 108 nenas e nenos, antes de comezar a travesía a borde deste buque científico dotado de alta tecnoloxía.
A experiencia “merece a pena e queremos levar a tódalas nenas e nenos desta idade a esta actividade de ocio extraordinaria e moi formativa”, apuntou o rexedor, que dixo ter comprobado como a maioría do alumnado non tivera a oportunidade de ir en barco ata o de agora. Así, avanzou que o obxectivo é manter o desenvolvemento deste programa e potenciar que se sumen á iniciativa os centros educativos da cidade.
O alumnado, nun percorrido dunha hora de duración, ten a oportunidade de coñecer o funcionamento, formación e produtividade da ría de Vigo e a inmensa riqueza das súas augas, o funcionamento do Nemo, un ROV submarino (vehículo non tripulado) que ofrece imaxes en calidade 4 K, que permiten ver o fondo da ría ou os mexillóns nas bateas, comproban como se utiliza unha mostra de plancto vivo, como é a inmersión co robot subacuático para visualizar o cultivo do mexillón e identificar as especies de fauna e flora que se vexan durante a inmersión.