luns, 27 setembro 2010

O goberno aproba no Pleno a anulación de sancións da zona azul co pago de 5 e 7 euros

Os votos do goberno local aprobaron a modificación da ordenanza da Xestión do Estacionamento Regulado (XER), a chamada zona azul, para que os infratores sancionados por non ter tique ou por superar o máximo de dúas horas de estacionamento permitido poidan evitar a sanción de 30 e 45 euros con pagos de 5 e 7 euros, respectivamente, na primeira hora despois da sanción. "Queremos facilitar as cousas", asegurou o concelleiro de Mobilidade, Xulio Calviño.

O Concello reduce en 2011 as taxas de asistencia domiciliaria e mantén as de garderías e centros para maiores

luns, 27 set 2010

O Pleno da Corporación ratificou este luns as ordenanzas fiscais para o próximo ano. Os impostos conxelaranse tras a aplicación do IPC (un 1,5%), non se actualizarán as taxas de escolas infantís e centros de maiores, e reducirase a de asistencia domiciliaria nun 1,31%. A concelleira de Facenda, Raquel Díaz, subliñou que a carga fiscal da cidadanía diminuirá o vindeiro ano, pese a ser hoxe en día o gran concello galego con menor carga fiscal.

O Pleno aproba unha moción instando a Fomento a recolocar a todos os traballadores das obras do AVE

luns, 27 set 2010

O Pleno da Corporación aprobou hoxe luns, a proposta do BNG, unha moción instando ao Ministerio de Fomento a que asuma o compromiso de recolocar a todo os traballadores que nos últimos meses foron despedidos das obras do túnel do AVE As Maceiras-Vigo. Igualmente se demanda do Goberno do Estado que obrigue ás empresas adxudicatarias á cumprir a normativa laboral e as medidas de seguridade nas obras tendo en conta a representación sindical dos traballadores.

O goberno local demanda á Xunta infraestruturas e medios materiais e humanos no ensino público vigués

luns, 27 set 2010

Os grupos municipais que conforman o goberno municipal aprobaron hoxe luns, a iniciativa socialista, sendas mocións educativas nas que se insta ao goberno autonómico a investir na reforma de centros escolares, comedores e na construcción de novos colexios, ademais de dotalos de recursos materiais e humanos para atender as necesidades do ensino público de Vigo.

María Méndez presenta ao Pleno o primeiro Plan das Migracións municipal dunha cidade galega

luns, 27 set 2010

A concelleira de Benestar Social, María Méndez, resaltou hoxe no pleno da corporación municipal que Vigo é a primeira cidade galega en contar cun Plan das Migracións e Convivencia Intercultural. A edil do BNG defendeu a necesidade de que Vigo conte con esta ferramenta para potenciar "a integración das persoas estranxeiras", xa que é a cidade galega con máis persoas inmigrantes empadroadas, cun total de 17.000.