VigoNature, espazo para a observación nas Noites Astronómicas
O Concello organiza este verán unha nova edición do programa divulgativo para achegar a observación do ceo a toda a familia, tamén para nenas e nenos maiores de 8 anos. Haberá 14 sesións nas noites de verán, entre xuño e setembro.
O alcalde avanzou a programación da nova edición das Noites Astronómicas que ofrece VigoNature este verán. Trátase dunha actividade divulgativa pensada para achegarse á observación do ceo a través de sesións con guías astronómicos, aprendendo o manexo de instrumentos como o telescopio e os prismáticos, con explicación da traxectoria dos astros, observacións do ceo, da lúa e con contidos adaptados a todos os públicos: adultos e nenos e nenas a partir de 8 anos.
As Noites Astronómicas de VigoNature prevén 14 sesións este verán: en xuño os días 6, 18 e 20; en xullo os días 4, 8, 11, 15 e 18; en agosto os días 5, 8, 15 e 19 e en setembro os días 5 e 12.
Tal e como explicou o rexedor, as sesións son para “grupos moi reducidos” de 25 persoas e para participar debe facerse unha inscrición previa na web www.vigonature.es. O prezo da actividade é de 6 euros por participante.