Abel Caballero: “A Vigo Cup superará os 5.500 participantes e baterá o seu propio récord”
O alcalde achegouse esta mañá ao Centro Comercial Vialia para presentar a nova edición, xunto á organización, patrocinadores e participantes. No acto entregáronse seis distincións a deportistas e clubs que pasaron polo torneo.
A nova edición da Vigo Cup contará con novidades; a máis relevante é que o estadio municipal de Balaídos será o epicentro das finais. Na presentación do evento o alcalde explicou que esta edición superará os 5.500 participantes e os 300 equipos, co que “baterá o seu propio récord”, volvendo a converterse un ano máis no maior torneo de fútbol base de España.
A competición desenvolverase na modalidade de fútbol sala do 12 ata o 21 de xuño e en fútbol 8 e fútbol 11 desde o 22 ao 28 de xuño. Os encontros disputaranse en 19 espazos, 12 campos de fútbol e 7 pavillóns. Outra das novidades é a celebración do Torneo New Balance de penaltis, que se disputará o 24 de xuño, na praza exterior do Centro Comercial Vialia.
Na presentación premiouse a seis entidades e deportistas que formaron parte da historia da Vigo Cup como: Lucía Camisón, Claudia Martínez, Elena Casal, Álex Abalde, Antón de Vicente e a ED Vigo 2015. Caballero apuntou que este ano se cumpren 25 edicións do torneo, nas que se suman “máis de 125.000 participantes”.
