Escoitar

O tenente de alcalde di que hai mellores opcións para o atraque do transporte de ría que a elixida polo Porto

O tenente de alcalde, Santi Domínguez, solicitará unha entrevista coa presidenta da Autoridade Portuaria para abordar a situación dos usuarios do transporte de ría tras a decisión do cambio do atraque. O nacionalista, que mantivo hoxe unha reunión coa Plataforma polo Transporte de Ría, afirma que hai outras posibilidades que causarían menos incomodidades aos viaxeiros.

martes, 28 set 2010
1285678244Ria.JPG
Santi Domínguez dixo compartir a posición da plataforma a respecto da ubicación elixida. Defendeu que os usuarios do transporte de ría "deben ser tratados co mesmo respecto que calquera outro usuario do Porto". Por iso, o nacionalista lamentou que se aposte por mellorar a chegada dos cruceristas -iniciativa que non cuestionou- pero non se teña o mesmo interese en ofrecer uns servizos axeitados aos viaxeiros de ría.

O tenente de alcalde considera que esta decisión sobre o atraque do transporte de ría "é unha mostra máis da improvisación da Autoridade Portuaria" e consecuencia da falta de un documento que planifique os espazos portuarios. Santi Domínguez indicou que, segundo os usuarios, o Porto non ofrecen argumentos que xustifiquen a opción elixida. Cuestionou tamén que se optara por unha zona aberta que no inverno vai resultar moi molesta para os viaxeiros e que no verán pode ter problemas polo tráfico marítimo de embarcacións deportivas.

Santi Domínguez pedirá á presidenta da Autoridade Portuaria que reconsidere a súa decisión e que opte pola "vía dialogada" cos usuarios para buscar unha mellor ubicación. "Eles teñen outras alternativas que poden ser máis válidas", adiantou.
Descargar todas as imaxes