Caballero anuncia a apertura do macroparque infantil da Finca Matías na primavera de 2027

O rexedor avanzou, no inicio das obras de “un dos macroparques máis grandes de España”, que o prazo de construción é de oito meses. “Entre os meses de marzo ou abril estará acabado e en uso”, recalcou.

Caballero afirmou que esta nova infraestrutura de lecer, que contará con dúas áreas diferenciadas de xogos en función das idades dos seus usuarios, “é imprescindible para Travesía de Vigo porque é unha área moi poboada que conta con pouca dotación de parques e zonas de xogos”. Remarcou que coa iniciativa municipal “estamos a suplir unha carencia de Travesía de Vigo e Rúa Aragón que se prolonga desde hai 30 anos” e que o goberno local continúa a súa norma de “que todas as zonas de Vigo teñan parques infantís, de maiores e as mellores dotacións”.

Avanzou que, tras a construción do parque, o Concello vai iniciar de forma inmediata a conexión desde Travesía de Vigo ao parque de Finca Matías a través de 3 ramplas, que serán aprobadas en xaneiro, cun investimento de máis de 2 millóns de euros.

O conxunto da intervención nesta zona superará os 5 millóns de euros, segundo explicou o alcalde. Lembrou que xa existe unha comunicación mecánica entre as rúas Travesía de Vigo e a rúa Aragón a través dunha rampla e un ascensor.

Cabaleiro avanzou que a pretensión municipal é facer unha parte enteira ao estilo do parque de Castrelos, con espazo para paseo e para sentarse, e construír un pavillón de deporte que formará parte do desenvolvemento que o PXOM contempla para a conexión entre as rúas Aragón e Travesía de Vigo.

Actuacións

• Creación de dúas áreas de xogo diferenciadas e separadas pola rúa Toxal.
• Adecuación dos accesos para a conexión integral das distintas áreas do macroparque.
• Creación de zonas de estar con novo mobiliario: bancos, mesas, papeleiras e fontes de auga.
• Renovación de subministracións: iluminación pública de alta eficiencia, saneamento, abastecemento, redes de enerxía, gas, telefonía e demais servizos.
• Acondicionamento de muros perimetrais e peches.
• Acondicionamento da área verde con nova xardinería; Plantación de céspede, pantallas vexetais; plantación de novas árbores e protección do arboredo existente.
• Novas instalacións de rego.