O alcalde anunciou hoxe mércores que o Concello vai seguir demandando ao Ministerio de Xustiza a dotación da quinta praza da Sección Sexta de Vigo, ao tempo que amosou o seu "agrado" pola adxudicación dunha praza de xuíz na Sección Quinta. Caballero destacou o importante volume de actucións xudiciais no ámbito do Civil que rexistran os xulgados da cidade.
O alcalde deu conta esta mañá da creación de 922 postos de traballo coas accións directas do Plan de emprego, unha cifra á que hai sumar os preto de 2.000 que xeran as políticas keynesianas. Así o explicou hoxe mércores, nun día no que se entregaron 55 diplomas da 5ª edición do Imos traballar 2.
O alcalde informou este mércores que "vai ben" o proceso de venda dos pisos municipais de República Arxentina, coa que se financiará o solo, con 10 visitas programadas para hoxe, e adiantou que no verán a administración local estará en condicións de ceder á Xunta os terreos para que constrúa a Cidade da Xustiza de Vigo. Caballero asegurou que o goberno autonómico non poderá iniciar entón a obra porque carece de orzamento ao efecto.
O goberno de Vigo respaldará ao Instituto de Cultura, Ciencia e Tecnoloxía, "de nova creación" e asentado na cidade, no seu obxectivo de divulgar o desenvolvemento tecnolóxico existente en Vigo, tanto na Universidade como nos centros tecnolóxicos e institutos de investigación. O alcalde definiu de "espléndida" a idea e solicitou ao ICCT un programa de accións para poñela en marcha.
Caballero entrevistouse este mércores cos responsables da Asociación de Representantes de Comercio, que celebran en decembro o seu 60º aniversario. O alcalde indicou que moitos dos representantes vigueses operan tamén no norte de Portugal, actuando como "axentes de exportación" das empresas da cidade.