VigoCultura regresa en outubro con 27 propostas de artes escénicas

Abel Caballero presentou a programación de VigoCultura para o segundo semestre de 2026, que se desenvolverá entre o 2 de outubro e o 29 de novembro cun total de 25 propostas de artes escénicas. Delas, 16 estarán dirixidas ao público adulto e nove ao público familiar, fundamentalmente no Auditorio Municipal, ademais de dúas actuacións de rúa que abrirán a nova tempada.

A tenente de alcalde e delegada da área de Cultura, Carmela Silva, e o concelleiro de Cultura, Gorka Gómez, tamén participaron na presentación na que se anunciou que o inicio chegará o venres 2 de outubro con “Mimo Circus Party Show”, un espectáculo itinerante desde a rúa do Príncipe ata Porta do Sol para todos os públicos, con malabaristas, equilibristas, zancudos, hula hoops e humor. O sábado 3 de outubro celebrarase a segunda proposta de rúa, “10 minutes”, de FAM Teatre.

O resto das funcións terán lugar no Auditorio Municipal. Os espectáculos para público adulto celebraranse os venres e sábados ás 20:00 horas, mentres que as propostas familiares serán os domingos ás 18:00 horas.

Caballero destacou a aposta municipal por manter prezos “moi asequibles” e fortemente subvencionados, co obxectivo de que a capacidade económica non sexa unha limitación para acceder á cultura. O rexedor puxo tamén en valor a resposta do público nas anteriores edicións, con “miles de persoas” asistindo ás funcións: “VigoCultura está tendo un éxito excepcional e continuaremos facendo cultura na cidade”.

A programación do Auditorio Municipal para adultos confórmase con 16 propostas:

◦ Venres 9 de outubro: estrea de “O que xermola do lume” de A Tríptica Teatro. Aborda os incendios forestais como ferida colectiva e punto de transformación

◦ Sábado 10 de outubro: “Begoña Caamaño, o transgredir das ondas” de Berrobambán. Percorrido pola traxectoria profesional e vital de Begoña Caamaño

◦ Venres 16 de outubro: “A velada de Londres” de Butaca Zero. Comedia co conde Drácula como protagonista

◦ Sábado 17 de outubro: “Poeta (perdido) en Nueva York” de El Aedo Teatro. Adaptación teatral dos poemas de Poeta en Nueva York coas cartas que Federico García Lorca escribiu á súa familia. Premio Max 2026 ao mellor deseño de produción privada, a obra estivo de xira por Londres, Romanía, Portugal e Francia

◦ Venres 23 de outubro: “Telma y Lola” de Teatro de Ningures. Comedia cun crime e un misterio por resolver

◦ Sábado 24 de outubro: “Bestseller, la obra que Lorca nunca escribió” de Horma Creativa. Comedia que satiriza sobre o postureo nas redes sociais, o ego e a necesidade de facerse viral no mundo cultural actual

◦ Venres 30 de outubro: “Girasoles para María. Homenaje a María Callas, Tina Turner, La Lupe y Celia Cruz” de Gretel Cazón. Espectáculo unipersoal musical que conta a vida dunha cantante de éxito e reflexiona sobre os seus temores e inseguridades

◦ Sábado 31 de outubro: “Esencia” de Teatro Español e Entrecajas Producciones. Unha obra que reflexiona sobre as nosas propias certezas, que foi Premio Talía 2026 ao mellor espectáculo e á mellor autoría

◦ Venres 6 de novembro: “Dentro y fuera. Pepe y Lucas”, de Etiqueta Negra. Comedia dos irmáns galegos que triunfan en TikTok co seu humor e creatividade

◦ Sábado 7 de novembro: “A furia de amanita” de Redrum Teatro. Drama sobre o dó, o choque xeracional e a conciencia social

◦ Venres 13 de novembro: “Contra Ana” de La Contraria. Teatro xestual de autoficción que retrata a anorexia desde a experiencia real da autora. Premio Max ao mellor espectáculo revelación 2025

◦ Sábado 14 de novembro: “O sangue das promesas: incendio” de Sarabela Teatro. Lanza unha mensaxe de esperanza por recuperar a dignidade e dar as costas á violencia e ao odio

◦ Venres 20 de novembro: “Los Hermanos”, coprodución de Festival Teatro Clásico de Mérida, Agencia Andaluza de Instituciones Culturales, GNP e Clásicos contemporáneos. Teatro-comedia clásica en clave contemporánea con música en directo e elementos de clown sobre dous modelos diferentes de educación. Premio Teatro Clásico de Mérida e de Córdoba.

◦ Sábado 21 de novembro: “Crónicas do rei pasmado” de Contraproducións. Versión teatral da sátira máis brillante de Torrente Ballester

◦ Venres 27 de novembro: “Ictus. Anatomía de A Derradeira Lección de Castelao” de Chévere Teatro. Proposta sobre como se constrúen as narrativas da memoria

◦ Sábado 28 de novembro: “Madness” de “Yllana”. Unha comedia musical sobre a vida nas marxes do sistema.

Haberá 9 propostas para público familiar:

◦ Domingo 4 de outubro: “Ándale! Bon Appetit! De Ghazafelhos”, unha comedia na que os chefs precisarán da participación do público

◦ Domingo 11 de outubro: estrea de “Fiadora de soños” de Baúl da Tía Lola. Historia divertida e emotiva sobre a amizade e a imaxinación

◦ Domingo 18 de outubro: “Mular o la gran captura” de Cinc Céntims Teatre. Proposta escénica contemporánea que reflexiona sobre a conservación da natureza, a identidade e a memoria colectiva. Premio FETEN 2026 ao mellor deseño de escenografía e caracterización

◦ Domingo 25 de outubro: “Commedia” de Píscore. Humor e música para ofrecer unha visión divertida da actualidade con novos instrumentos, astronautas, extraterrestres e naves espaciais

◦ Domingo 1 de novembro: “Únicos” de Da.te danza, danza contemporánea que propón unha viaxe existencial. Premio FETEN 2026 ao mellor espectáculo de danza

◦ Domingo 8 de novembro: “Que brisa, la risa. Espectáculo para primeira infancia” de María Escobar, para os máis pequenos, de 6 meses a 3 anos

◦ Domingo 15 de novembro: “Retranca e maxia” de Luís Boyano. Espectáculo de maxia e risa

◦ Domingo 22 de novembro: “Zepo Zapo” de Markeliñe Teatro. Espectáculo xestual que conta a historia dunha guerra a través de dúas soldados inimigas

◦ Domingo 29 de novembro: “Voo” de Teatro O Cubo, espectáculo contemporáneo de manipulación de obxectos, danza, música, movemento.