O alcalde reitera á Xunta a petición de venda dunha parcela para aparcadoiro no Cunqueiro
O alcalde censura a negativa do goberno autonómico de facilitar ao Concello a compra da parcela, situada fronte á entrada do hospital Álvaro Cunqueiro, para construír un novo aparcadoiro gratuíto de 450 prazas.
Abel Caballero reiterou este martes a súa petición á Xunta de Galicia para que “nos vendan, xa non se me ocorre dicir que nos cedan, a parcela que está diante do hospital para facer outras 450 prazas de aparcamento gratuítas”. Con todo, deixou entrever a a resposta negativa do goberno autonómico que “non quere que fagamos prazas gratis no hospital”, dado que xa se opuxeron á construción do actual aparcadoiro.
Así, lembrou que o Goberno de Vigo xa ergueu un aparcadoiro público e de balde de 450 prazas ao carón do centro hospitalario. “Por que non nos venden a parcela diante da entrada do hospital? Por que non o explican? E se nalgún momento se precisa ese espazo para a ampliación do hospital, revertémolo. Non queremos que se esquilme á xente que vai ao hospital e permanece estancias longas”, sinalou o rexedor.
Amais, criticou Caballero que o grupo popular de Pontevedra reclame ao Concello pontevedrés que dispoña prazas gratis de aparcamento no hospital cando en Vigo “se opuxeron ás que xa fixemos”.