O alcalde celebra a celeridade na autorización da fábrica de microchips en Vigo
“Unha gran noticia”, valora o rexedor, tras a luz verde do Estado á planta de chips fotónicos cun investimento de 17,2 millóns de euros, que situará a cidade “á altura de Francia e Alemaña” como centros de produción da Unión Europea.
O Consello de Ministros vén de autorizar a participación do Ministerio para a Transformación Dixital e da Función Pública, a través da Sociedade Española para a Transformación Tecnolóxica (SETT), na empresa viguesa de fotónica integrada SPARC que, á súa vez, está participada pola SETT, o xigante tecnolóxico INDRA, Vigo Activo e a Zona Franca de Vigo.
Abel Caballero puxo en valor a celeridade do Goberno na resolución desta petición, lembrando que hai catro meses que abordou este tema co Ministro de Tecnoloxía, Óscar López. “É unha gran noticia”, apunta, e “isto é o principio, o mundo precisa microchips e Vigo desenvolve a tecnoloxía de fotóns que soamente temos nós”.
Coa factoría que se instalará no Parque Tecnolóxico de Valadares, “Vigo sitúase á altura de Francia e Alemaña”, que van ser os tres grandes centros de produción de microchips da Unión Europea. Trátase dunha tecnoloxía clave para a autonomía estratéxica española e europea, vital nos sectores de defensa e aeroespacial.
A luz verde do Goberno á fábrica de chips fotónicos de Vigo supoñerá unha inxección de 17,2 millóns de euros. A operación realízase co modelo de coinversión da SETT, apostando pola colaboración público-privada en sectores estratéxicos como o das tecnoloxías avanzadas
Este investimento no SPARC forma parte do PERTE Chip, previsto polo Plan de Recuperación, Transformación e Resiliencia. Tal e como lembrou o alcalde, o Goberno de España xa concedera 3 millóns de euros do Perte Chip a este proxecto vigués e ademais, a Cátedra Chip da Universidade de Vigo recibiu unha subvención de 4,7 millóns de euros para poder formar ao persoal de enxeñería que traballará na construción de microchips fotónicos.