Caballero critica a subida do canon de Sogama e pide explicacións ao presidente da Xunta
O Boletín Oficial da Provincia publicou o padrón de lixo en vivendas que establece as tarifas de recollida de residuos sólidos. O alcalde sinala a “ineficacia” da Xunta pola suba de case un 70% por parte de Sogama, organismo dependente do goberno autonómico, que pasa de cobrar 61,7 euros/tonelada de residuos a 104,5 euros / tonelada en pouco máis dun ano.
Abel Caballero criticou “a ineficacia” da Xunta de Galicia pola obriga de ter que pagar a través do recibo do lixo a suba do canon de Sogama, que pasou de 61,7 euros tonelada en 2023 a 104,5 euros/tonelada na actualidade. O alcalde esixe explicacións do presidente da Xunta, Alfonso Rueda, “de por que Vigo ten que pagar a ineficacia de Sogama, organismo dependente do goberno autonómico, coa subida dun 70% en pouco máis dun ano”.
Hoxe publicouse no Boletín Oficial da Provincia o padrón do lixo nas vivendas que estará en exposición pública durante 15 días e establece as tarifas para a recollida de residuos sólidos. “As taxas soben porque hai que repercutir a suba do canon de Sogama, que é imposible de evitar”, lamentou o alcalde.
Caballero afirmou que “seguirá apoiando a cidade” e mantén a política de bonificacións para familias numerosas, monoparentais, persoas que viven soas, con diversidade funcional, persoas con máis de 65 anos e renda baixa, así como dependentes, vítimas de violencia de xénero e baixo nivel de renda.