O Concello investirá preto de 1,5 millóns no novo acceso ao Párroco don Camilo
O goberno local solucionará os problemas de seguridade nos accesos ao Párroco don Camilo coa construción dun novo viario conectado coa estrada de Baiona (PO-552) que conta un orzamento aproximado de 1,5 millóns. Con ese obxectivo, a Xerencia de Urbanismo aprobará a semana que vén un Plan Especial de Infraestruturas.
O Concello xa ten “moi avanzada” a construción dun novo acceso ao colexio Párroco don Camilo que está valorado en 1,3 millóns. O alcalde anunciou que a Xerencia de Urbanismo aprobará definitivamente a semana que vén un Plan Especial de Infraestruturas que permitirá crear unha nova conexión coa estrada PO-552. A partir de aí, procederase á expropiación e á redacción do proxecto construtivo.
Tal e como explicou Caballero, o Concello leva moitos anos tratando de solucionar un problema de seguridade xurídica nos accesos a este centro educativo pero a Xunta impediu o procedemento máis áxil. Referiuse ao intento municipal de salvar esta situación a través da Lei Vigo 3/ 2016 unha iniciativa bloqueada polo goberno autonómico. De feito, insistiu, a Axencia Galega de Infraestruturas tardou moito en demorar a súa autorización.
Finalmente, proseguiu, deseñamos un acceso rodado e peonil en zig zag atendendo ao desnivel existente entre o colexio e o viario principal. Esta nova infraestrutura xorde tamén como un elemento de oportunidade de cara ao futuro, engadiu. O itinerario peonil proxectado poderase integrar nunha futura zona verde prevista na ficha do ámbito do PXOM que sirva de conector entre a zona verde, o equipamento escolar e as instalacións deportivas e de ocio.