Vigo concedeu desde xaneiro 3.667 axudas de emerxencia por máis de 1.200.000 euros
"Todas as axudas de emerxencia que se presenten e xustifiquen son atendidas, se están ben xustificadas e se corresponden con necesidades reais, van ser atendidas na súa totalidade", asegurou o alcalde.
A comisión de axudas de emerxencia celebrada esta semana aprobou a concesión de 25 solicitudes por 5.569 euros, segundo avanzou este xoves o alcalde.
Do total de apoios, o maior número volve ser para o pago do alugueiro, xa que se aprobaron 9 solicitudes por 2.090 euros. A estas súmanse 2.550 euros para as necesidades de alimentación, así como 723 para o pago de débedas da comunidade, 146 para 4 recibos de auga e 59 para 4 facturas de luz.
O alcalde lembrou que este ano se ampliou en 200.000 euros a partida para axudas de emerxencia. "Este ano estamos por enriba das axudas concedidas o ano pasado", recalcou, incidindo en que "seguiremos prestando tantas axudas de emerxencia como sexa preciso porque non hai límite orzamentario e, de feito, xa ampliamos o orzamento ata 1.400.000 euros en previsión de aumento das solicitudes".