O goberno municipal aproba obras na cidade por valor de 1,4 millóns de euros
A Xunta de Goberno Local dará luz verde mañá ás obras de afianzamento do muro e do talude do campo municipal de fútbol de Sárdoma-Moledo, ás obras do muro de contención do Parque Nelson Mandela de Navia e ás da cuberta da pista vermella das Travesas.
![](https://xornal.vigo.org/storage/images/opt/xHV9dVxW7ZiL31igC9QqBC1eIIn1Q8LSpgmOm8Ly.jpeg)
Abel Caballero informou este xoves da aprobación na sesión ordinaria de mañá venres da Xunta de Goberno Local do proxecto das obras de afianzamento do muro e do talude do campo municipal de fútbol Sárdoma-Moledo, “unha obra importante” que require dun investimento superior aos 718.000 euros para reparar e estabilizar o talude nunha parte do campo que se atopa moi danado. “O muro ten unha altura de 16 metros que precisa reforzo e afianzamento para deixar o campo en condicións”, apuntou.
Ademais, recibirá luz verde municipal o proxecto de obras do muro de contención no parque Nelson Mandela en Navia que ten un orzamento de 450.000 euros. O goberno local construirá unha bancada para integrar a parte superior do parque coa vía pública e, adicionalmente, na unión entre as bancadas e o novo muro, ergueranse unhas novas escaleiras que permitan o acceso peonil á parte superior do parque. Tal e como explicou o rexedor, o Concello executou xa a primeira fase da mellora do parque Nelson Mandela de Navia, cun investimento de 1,5 millóns de euros “para que estea nas mellores condicións”.
Cuberta da pista vermella
O alcalde avanzou este xoves que quedará aprobado tamén o proxecto da obra de substitución da cuberta do pavillón polideportivo da pista vermella das Travesas por un importe de 250.000 euros. A actual cuberta, que é “moi antiga, está deteriorada por humidade e choivas”, polo que cómpre a súa renovación cunha “cuberta nova cun gran lucernario en chapas de aceiro, que ofrecen a mellor cobertura”.
As obras do cambio da cuberta da pista vermella serán compatibles co desenvolvemento das actividades deportivas no resto de recintos do complexo das Travesas.