Caballero anima aos escolares "estudar moito" para cumprir o soño de ser alcaldes de Vigo
Abel Caballero explicou este xoves aos alumnos do Colexio Andersen, que participan no programa municipal "Visita o teu Concello" , os principais temas que centran o seu traballo á fronte da alcaldía de Vigo co obxectivo de mellorar a calidade de vida dos vigueses. Indicou ao escolar que lle preguntou se é fácil ser alcalde que non é sinxelo "pero si apaixoante". Engadiu que está "feliz de gobernar Vigo e de traballar sen parar os 365 do ano", lembrando que nos 17 anos de mandato non tivo vacacións. Aos estudantes que expresaron o seu desexo de querer ser alcaldes no futuro, recomendoulles "estudar moito".
