A Praza América tinguirase de amarelo polo Día Internacional contra o Cancro Infantil
O 15 de febreiro conmemórase o Día Internacional contra o Cancro Infantil e o Concello ilumina a pérgola da praza, en colaboración coa asociación Bicos de Papel. Os autobuses urbanos de Vigo tamén cooperan e trasladan a mensaxe nos frontais dos vehículos.
O Concello de Vigo iluminará de amarelo a pérgola de Praza América polo Día Internacional do Cáncer Infantil. Abel Caballero declarou en rolda de prensa que acolle a petición da asociación Bicos de Papel e súmase deste xeito á reivindicación deste 15 de febreiro.
O obxectivo é concienciar á sociedade sobre a enfermidade e sobre a necesidade de que todos os nenos e nenas con cáncer teñan acceso a unha diagnose e tratamento adecuados.
A acción esténdese ao transporte urbano de Vigo. A empresa concesionaria do servizo municipal, Vitrasa, tamén colabora con Bicos de Papel e todos os vehículos portan o rótulo "Día contra o Cancro Infantil", para apoiar, concienciar e visibilizar a enfermidade e o Día Internacional contra o Cancro Infantil.
Por outra banda, este martes tamén estarán iluminadas de cor azul as fontes de Aragón para dar visibilidade ao Día Internacional do Síndrome de Angelman.