Caballero pon a primeira pedra das obras das ramplas da Gran Vía entre Venezuela e Praza de España
O orzamento é de 4.234.000 euros, parte deles solicitados aos fondos Next Generation do ministerio de Transportes, Mobilidade e Axenda Urbana. O prazo previsto das obras é de 8 meses.
O alcalde de Vigo puxo a primeira pedra das obras da segunda fase das ramplas da Gran Vía, que vai desde a rúa Venezuela ata Praza de España. Será unha actuación de dúas cintas mecánicas cunha lonxitude de 150 metros. O tempo estimado para rematar as obras é de 8 meses, polo que Abel Caballero aclarou que “será unha obra relativamente rápida”.
O orzamento é de 4.234.000 euros, parte deles solicitados aos fondos Next Generation EU do ministerio de Transportes, Mobilidade e Axenda Urbana. Na primeira fase foron 5.500.000 euros, financiados a través dun proxecto EDUSI, polo que o total da Gran Vía son “cerca de 10 millóns de euros”, cifrou o rexedor.
As ramplas contarán con pavimento descontaminante e un novo xardín botánico, tanto no interior como no exterior, terán sistema de aforro enerxético e capacidade para transportar a 7.300 persoas cada hora: “Emisións de gases de efecto invernadoiro, cero. A enerxía da cidade de Vigo é toda renovable, polo tanto cero emisións e unha mobilización continua”, subliñou Caballero.
Ademais das ramplas, a humanización da Gran Vía terá novas tubaxes de saneamento, abastecemento e pluviais, nova rede soterrada de servizos (iluminación, semáforos…), novos pavimentos e beirarrúas de granito, novo mobiliario urbano, nova sinalización, rede semafórica, iluminación e dotación de innovación tecnolóxica.
O alcalde lembrou os recoñecementos polas ramplas da Gran Vía como o premio da Semana Europea da Mobilidade Sostible que outorga o ministerio para a Transición Ecolóxica; o premio ao Proxecto do Ano 2021 da publicación Elevator World no que Vigo é galardoada xunto a outras iniciativas de mobilidade en Melbourne, New York, Jerusalén ou Hong Kong; e o Access City Award da Comisión Europea polo proxecto Vigo Vertical, que segue a sumar ascensores, ramplas e escaleiras na cidade: “A bulevar da Gran Vía era moi poco utilizado, agora é unha das rúas e avenidas máis utilizadas da cidade”, sentenciou.
