Porta do Sol e Príncipe acollerán o Entroido 2020 con máis de 20 actos durante seis días
O alcalde de Vigo presentou este martes a programación do Entroido vigués, que se celebrará do 21 ao 26 de febreiro con máis de 20 actividades, concertos e actos. O concurso de disfraces e o desfile de comparsas será o sábado 22 ás 18 horas. Soraya actuará o venres despois da entronización do Meco (20:00 horas) e Ketama sairá ao escenario de Porta do Sol o sábado (21:30 horas) .
Abel Caballero informou este mércores en rolda de prensa dos actos programados polo Concello de Vigo para celebrar o Entroido. A Porta do Sol, con pequenas limitacións polas obras, e a contorna do Príncipe acollerán máis de 20 actividades, concertos e actos.
A programación festiva do Entroido vigués estenderase dende o 21 ao 26 de febreiro. Os concursos de disfraces, se o tempo o permite, celebraranse diante do MARCO, en Príncipe, desde as 17:30h nas categorías individual e grupo conxuntado infantil (ata os 13 anos) e desde as 18:30h para a individual e grupo conxuntado xeral (desde 14 anos). As inscricións, na mesma rúa do Príncipe desde unha hora antes do inicio de cada concurso.
O desfile de comparsas partirá do nó de Isaac Peral ás 18h do sábado 22 de febreiro. Mantén o percorrido habitual, con finalización en Porta do Sol, mais o Concello prevé un final próximo alternativo en caso de que as obras de peonalización o impidan, segundo confirmou Abel Caballero. As comparsas deberán ter un mínimo de 35 integrantes e haberá premios de 3.000, 2.500 e 2.000 euros respectivamente para os tres primeiros e catorce accésits de mil euros cada un.
Programa
O alcalde lembrou as actividades do Entroido vigués deste ano, comezando o venres 21 de febreiro con animación de rúa en Príncipe e Porta do Sol desde as 18 horas, entronización do Meco ás 20h e posterior concerto de Soraya Arnelas. O sábado, novamente animación da rúa no centro pero desde as 17h, co desfile-concurso de comparsas e carrozas ás 18h e concerto de Ketama na Porta do Sol (21:30 horas).
Para o domingo, os merdeiros estarán no centro histórico en horario de mañá e tarde. Ás 10h arranca en Príncipe a carreira popular infantil e unha hora máis tarde, a categoría de adultos e veteranos, con saída en Porta do Sol e percorrido por Elduayen, Paseo de Alfonso, Pi y Margall, López Mora, Camelias, Romil, Cachamuiña, Pracer, Progreso, Doutor Cadaval e final na Porta do Sol. Na tarde do domingo, animación de rúa de 17 a 19h en Príncipe e Praza da Princesa, actuacións infantís ante o MARCO ás 17h e chocolatada infantil ás 18h no mesmo emprazamento.
O luns 24, obradoiros e animación infantil de 17 a 20h diante do MARCO, cunha chocolatada infantil ás 18h. O martes 25, novamente os merdeiros polo centro histórico en horario de mañá e tarde, os concursos de disfraces ante o MARCO e a queima do Meco ás 22:30h na Porta do Sol.
O mércores 26 de febreiro, exequias funerarias solemnes das comparsas e acompañamento da comitiva ás 18h, en Porta do Sol, Príncipe, Colón, Policarpo Sanz e volta á Porta do Sol. Este será o punto de celebración do enterro do Meco, ás 19:30h, cos oficios laicos, responsos e sermóns, e lectura da acta do xurado e entrega de premios dos concursos de comparsas e carrozas.
