Escoitar

A VII edición do Salón do Interiorismo e a Construción de Vigo, SICO 2019, celébrase no Ifevi do 5 ao 7 de abril<br />

Esperan a presenza duns 10.000 visitantes e máis de 120 expositores.

luns, 25 mar 2019
O Salón do Interiorismo e a Construción de Vigo, SICO, celebra a súa sétima edición do 5 ao 7 de abril no Ifevi coa presenza de máis de 120 expositores e expectativas de atraer a uns 10.000 visitantes.

O evento, organizado por Muéstralo, pretende seguir o camiño percorrido en anteriores edicións para situarse entre os primeiros salóns de referencia a nivel nacional e prestar unha especial atención ao mercado portugués. Así o asegura o director de Muéstralo, Javier Arnau, que presentou esta mañá o evento acompañado do concelleiro de Facenda, Jaime Aneiros, e do delegado da Xunta en Vigo, Ignacio López Chaves.

Buscando as sinerxias e oportunidades do sector, o SICO contará de novo coa participación das empresas máis importantes do sector e as entidades representativas dos subsectores da construción. O venres estará dirixido ao público profesional e a fin de semana a feira abrirase ao público xeral. En ambos os casos a entrada é gratuíta.

Nesta edición, a feira inclúe como novidade un apartado para o interiorismo.

O evento abrirase o venres día 5 co congreso "A boa arquitectura non entende de escalas", que contará co relatorio maxistral do arquitecto Mark Fenwich.

Outros relatorios versarán sobre o gas radón nas edificacións, o sistema Thermo C de revestimento eficiente de paredes, a evolución do mercado estrutural en madeira e a climatización en obra nova, entre outros.

Ademais, pensando no público xeral, haberá unhas sesións de showcooking da man da bloggera Lady Compostela, un concurso de Verticalia que consistirá en subir cun arnés ao teito do Ifevi, e a exposición de León López da Osa "A esencia do obxecto".

Aneiros asegurou que este evento "permite colocar a Vigo como referente do sector do interiorismo e da construción, dous dos sectores máis azoutados pola crise económica". Ademais, destacou o valor de que os expositores "aposten por traer a Vigo as súas propostas e as novidades do sector".