O Concello colabora con Nós Mesmas na organización dunha semana actos pola festa do Orgullo

Este luns comezan as actividades coa izada da bandeira no Concello e a celebración dun obradoiro na Casa das Mulleres. O día central será o sábado, 28 de xuño, coa manifestación "Polos Dereitos Humanos LGTB" e a Festa Orgullosx na Praza da Pedra. A concelleira de Igualdade, Isaura Abelairas, animou á participación para defender os dereitos do colectivo.

luns, 23 xuñ 2014
1403524703isaura.JPG
Este luns deu comezo a celebración do Orgullo Vigo 2014 co izado da bandeira no Concello de Vigo, unha serie de actos reivindicativos que se alongarán durante toda a semana e terán a súa xornada principal o próximo sábado, cunha manifestación e festa na Praza da Pedra. Isaura Abelairas e Raquel Cordeiro, en representación de Nós Mesmas, presentaron hoxe a festa do Orgullo ante os medios de comunicación.

Ás 20 horas deste luns, a Asociación Nós Mesmas -organizadora coa colaboración do Concello de Vigo do evento, xunto ao apoio dos comerciantes e hosteleiros do Casco Vello- programa na Casa das Mulleres un obradoiro de autoerotismo femenino. Mañá martes terá lugar unha lectura aberta na Praza da Constitución ás 18 horas e a presentación do libro "Sangue Doce" no Plaff, ás 20 horas.

O mércores, ás 19 horas, mostra das curtametraxes "La Pecca Selección" no MARCO, e o día seguinte, xoves 26 de maio, á mesma hora, unha mesa redonda dos dereitos LGTB na Biblioteca Central de Vigo. A programación pola semana comprétase con contacontos infantís na Praza da Constitución -o venres, ás 19:30h- e cun encontro-xantar en Alcabre, ás 13 horas do domingo. Ao longo da presente semana, o público interesado ten a súa disposición unha mostra fotográfica na Praza da Princesa e outra exposición na Biblioteca Pública.

O sábado, 28 de xuño, será o día central dos actos programados para a celebración do Orgullo. Con saída ás 20 horas do cruce de Urzáiz con Colón, unha manifestación percorrerá as rúas do centro da cidade baixo o lema "Polos Dereitos Humanos LGTB", ata rematar na Praza da Pedra. O pregón correrá a cargo de Beatriz Suárez Briones, ás 21:15h, dando paso á Festa Orgullosx na Praza da Pedra, desde as 21:30h, coa participación de "La Prohibida" e o DJ Pablo Senra.

A manifestación quere denunciar a situación na que se atopan as persoas LGTB en lugares do mundo como Rusia, as violacións correctivas en Sudáfrica, as modificacións de Constitucións na Unión Europea para impedir o matrimonio entre persoas do mesmo sexo, a existencia de sete países con pena de morte por homo ou transexualidade e 77 con algún tipo de condea. Tamén se pretende denunciar a peor situación de España, cun modelo político e social que deixa unha cidadanía de primeira e outra de segunda e onde a sanidade, a educación e a igualdade deixan de ser Dereitos Humanos Fundamentais para convertirse en privilexios duns poucos, segundo expuxo ante os medios Raquel Cordeiro, en representación de Nós Mesmas.
1403524703isaura.JPG
1403524719orgullo.jpg
Descargar todas as imaxes