Vigo buscará fondos europeos para proxectos de mellora urbana no contorno portuario

O alcalde, Lois Castrillo, anunciou hoxe, trala reunión da Comisión Portuaria das Cidades do Arco Atlántico, que Vigo tentará obter fondos europeos para desenvolver proxectos de mellora urbana no contorno do porto. A xuntanza da comisión, desenvolvida nas instalacións do Museo de Arte Contemporánea, serviu para que o Goberno municipal sondease a posibilidade de presentar proxectos conxuntos con outras cidades portuarias da fachada atlántica para optar a fondos Interreg da Unión Europea.

Na próxima reunión das cidades do Arco Atlántico, a desenvolver en Cardiff no mes de xullo, Vigo tentará concretar con que cidades se asociará para presentar o seu proxecto. Na reunión de hoxe, as cidades participantes abordaron asuntos como a recuperación de espacios portuarios para uso público ou a conservación ambiental dos portos, materias sobre as que podería versar o proxecto que opte a recibir fondos europeos.

Lois Castrillo manifestou que a constitución da Comisión Portuaria de cidades do Arco Atlántico representa o intento das cidades atlánticas de tamaño medio de ter un maior peso en Europa e conseguir, por exemplo, que estas urbes portuarias dispoñan de conexións modernas ás redes europeas de ferrocarril.