Escoitar

Concello, Universidade e Caixanova amplían o horario das bibliotecas para respostar ás necesidades dos estudantes

A Biblioteca Municipal Central, a Biblioteca Central da Universidade e a Biblioteca Central de Caixanova ampliarán os seus horarios de cara aos exames de xuño co obxectivo de "dar resposta ás necesidades e demandas dos estudantes", segundo salientou este venres o concelleiro de Cultura, Xesus López.

venres, 29 mai 2009
1243602364bibliotecaestudio.jpg
Na presentación desta iniciativa, na que tamén participaron a vicerreitora de Extensión Universitaria, María Camen Cabezas, e a representante da Obra Social de Caixanova, María Pereira, o concelleiro nacionalista destacou que con esta medida "seguimos avanzando na coordinación" das bibliotecas da cidade.

A Biblioteca Central da Universidade de Vigo e a de Caixanova amplían os seus horarios dende mañá sábado, 30 de maio e ata o domingo 21 de xuño. A do campus de Lagoas-Marcosende abrirá de 9 a 22 horas os sábados e de 9 a 21 horas os domingos. Pola súa banda banda, a Biblioteca do Centro Cultural Caixanova abrirá sábados e domingos de 9 a 21 horas. A Biblioteca Central Municipal, ubicada na rúa Joaquín Yáñez, amplía o seu horario do 8 ao 19 de xuño e nos meses de xullo e agosto. Deste xeito, do 8 ao 19 de xuño estas instalacións municipais abrirán de luns a venres de 9 a 24 horas, os sábados de 10 a 14 e de 17 a 22 horas e os domingos de 10 a 14 horas. Asemade, nos meses de xullo e agosto a biblioteca permanecerá aberta de 9 a 14.30 e de 16 a 20 horas.

A vicerreitora de Extensión Universitaria, María Carme Cabezas, explicou que a proposta de ampliar os horarios das bibliotecas da cidade partiu da propia Universidade, "en particular dos estudantes e os seus representantes, que comunicaron a súa gran necesidade de contar con máis postos de estudo en especial nesta convocatoria de xuño", puntualizou. Neste sentido agradeceu á Concellería de Cultura, "pola ampliación do horario da Biblioteca Central", e a de Mobilidade, "polo reforzo do horario de autobuses durante as fines de semana para ir á Biblioteca do Campus". Vitrasa ampliará o horario da liña 8 Universidade-Porto-Areal, do 30 de maio ao 21 de xuño, axuntándose aos horarios de apertura e peche da biblioteca.

"Caixanova non podía ser allea a dar unha resposta pronta a esta demanda", salientou a representante da Obra Social Caixanova, María Pereira. Asemade, destacou a importancia da colaboración tanto co Concello de Vigo como coa Universidade e sinalou que a vocación de servizo de Caixanova queda reflectida na posta "a disposición da cidadanía das nosas dependencias".

A apertura das tres bibliotecas permitirá poñer a disposición do estudantado máis de 700 postos de lectura durante catro fins de semana consecutivos, nos que as bibliotecas permanecerán abertas, tanto os sábados como os domingos.
1243602364bibliotecaestudio.jpg
1243602400horariobiblioteca.jpg
Descargar todas as imaxes